Það var heldur betur dramatík þegar Árborg fékk Vængi Júpíters í heimsókn á Selfossvöll í 4. deild karla í knattspyrnu í kvöld. Leiknum lauk með 3-3 jafntefli.
Vængir komust yfir strax á 3. mínútu en Þorvarður Hjaltason jafnaði með glæsilegu skallamarki á 15. mínútu. Árborg hafði góð tök á leiknum eftir það en fékk mark í andlitið á 27. mínútu úr skyndisókn gestanna. Gestur Helgi Snorrason var hins vegar ekki á því að hleypa Vængjum með forskot inn í leikhléið og hann jafnaði metin skömmu síðar með nettu skoti úr teignum. Staðan 2-2 í hálfleik.
Seinni hálfleikur var markalaus þrátt fyrir ágæt færi beggja liða, allt þar til komið var fram í uppbótartímann. Vængir skoruðu ótrúlegt mark með langskoti utan af velli á 93. mínútu og leiktíminn var við það að fjara út þegar brotið var á Frey Héðinssyni í vítateig gestanna og Árborg fékk vítaspyrnu. Gestur Helgi fór ískaldur á punktinn og jafnaði 3-3 þegar 96 mínútur voru komnar á klukkuna.
Árborg situr í 3. sæti deildarinnar með 26 stig en þetta eru fyrstu mörkin sem liðið fær á sig á heimavelli í sumar. Vængir Júpíters eru í 6. sæti með 12 stig.