Uppsveitir tóku á móti KM í 5. deild karla í knattspyrnu á íþróttavellinum á Laugarvatni í kvöld. KM sigraði 3-4 eftir dramatískan lokakafla.
Uppsveitir náðu sér ekki á strik í fyrri hálfleik og gestirnir komust yfir á 28. mínútu. Á 42. mínútu var staðan orðin 0-2 en Uppsveitir gerðu tvöfalda skiptingu strax í kjölfarið og mínútu síðar skoraði varamaðurinn Jose David Martinez, 1-2 í hálfleik.
Uppsveitamenn fengu svo mark í andlitið á upphafsmínútum seinni hálfleiks en Martinez minnkaði muninn í 2-3 á 78. mínútu. Í kjölfarið dró heldur betur til tíðinda.
Á 81. mínútu fékk markvörður KM sitt annað gula spjald og þar með rautt og manni fleiri náðu Uppsveitir að kreista fram jöfnunarmark á 6. mínútu uppbótartímans. Enn og aftur var þar Martinez á ferðinni og nú stangaði hann boltann í netið eftir hornspyrnu. Uppsveitir héldu áfram að sækja manni fleiri en skildu bakdyrnar eftir opnar og á 98. mínútu geystist KM fram í skyndisókn og skoraði sigurmarkið.
Eftir níu umferðir eru Uppsveitir í 7. sæti A-riðilsins með 10 stig en KM lyfti sér upp í 5. sætið og er með 13 stig.