„Dóri og Örn þurfa að henda í pizzapartý og Die Hard í tækið“

Guðmundur Hólmar Helgason var einn af gestum þáttarins. Ljósmynd/Sigurður Ástgeirsson

Það var nóg um að ræða í nýjasta þætti Selfoss hlaðvarpsins sem kom út í gærkvöldi. Þar ræddu þeir Arnar Helgi Magnússon, Guðmundur Hólmar Helgason, Þórir Ólafsson og Hólmar Höskuldsson allt það heitasta í handboltanum.

Til umræðu var gengi karlaliðs Selfoss sem hefur verið brösótt undanfarnar vikur. Leikið hefur verið þétt í síðustu vikur og lítil hvíld milli leikja.

„Við þurfum bara aðeins að þétta raðirnar. Ef við náum að rúlla liðinu aðeins betur þá eigum við meira á tanknum síðasta korterið. Síðasta korterið erum við aðeins komnir á hælana og erum að tapa 1 á 1 stöðu og fá á okkur einföld mörk,“ sagði Guðmundur Hólmar.

„Ég held að Dóri (Halldór Jóhann) og Örn þurfi að henda í eitt gott pizzapartý og setja Die Hard í tækið, gera eitthvað annað en að fara bara inn í sal og æfa Kairó eða eitthvað álíka. Það er leikið mjög þétt næstu daga og við þekkjum þessa drengi, þeir kunna þetta allt. Það þarf bara eitt gott partý,“ bætti Þórir Ólafsson við.

Næsti leikur liðsins er gegn ÍR á fimmtudagskvöld. Sá leikur hefst klukkan 19:30 og er spilaður í Hleðsluhöllinni.

Læknarnir ánægðir með aðgerðina
Guðmundur Hólmar varð fyrir því óláni á dögunum að slíta hásin. Hann fór í aðgerð í síðustu viku en nú tekur við löng og ströng endurhæfing.

„Endurhæfingin er nú ekki komin langt. Læknarnir voru ánægðir með aðgerðina og þetta lítur allt saman vel út. Ég losna bráðum við hækjurnar og eftir það þá er þetta bara allt á uppleið,“ sagði Guðmundur léttur í bragði.

„Menn tala um 6-7 mánuði eftir aðgerð. Ég er að horfa á mánaðarmótin ágúst-september, vonandi verð ég orðinn mjög góður um miðjan september. Hausinn er þó ekki alveg kominn þangað,“ sagði Guðmundur að lokum.

Hér fyrir neðan má hlusta á Selfoss hlaðvarpið: