Selfyssingar ætla að semja við þrjá leikmenn sem hafa verið á reynslu hjá félaginu að undanförnu.
Þetta eru Fílabeinsstrendingarnir Bolou Guessan, sem leikur frammi eða framarlega á miðjunni og miðjumaðurinn Jean Stephane Yao Yao og Svíinn Martin Dohlsten, sem getur bæði leikið sem hægri bakvörður eða kantmaður.
Selfoss mætir Fylki í 12.umferð Pepsi-deildarinnar á sunnudagskvöld en Guðmundur Benediktsson, þjálfari, býst ekki við að hægt verði að ganga frá félagaskiptunum fyrir þann tíma. Guessan og Yao Yao eru á mála hjá Lyn í Noregi og Dohlsten hjá Ljungskile í Svíþjóð.
„Það eru litlar líkur á því að þeir verði með okkur á sunnudaginn þar sem félagaskiptapappírarnir eru að fara frá okkur í dag. Þetta tekur sinn tíma og skrifstofur knattspyrnusambandanna eru ekki opnar um helgar,“ sagði Guðmundur.
Þá er framherjinn skoski Stuart Kelly til skoðunar hjá Selfyssingum. „Hann mætti á sína fyrstu æfingu í gær en það var lítið að marka það því hann átti langt ferðalag að baki frá Nýja-Sjálandi. Það hljóta samt að vera meðmæli að koma úr deildinni þar því Nýsjálendingar voru eina taplausa liðið á HM,“ sagði Guðmundur léttur í bragði.