Taekwondosamband Íslands hefur valið Daníel Jens Pétursson og Ingibjörgu Erlu Grétarsdóttur taekwondofólk ársins. Bæði keppa þau fyrir Umf. Selfoss.
Ingibjörg Erla hefur verið fremsta taekwondokona landsins í yngri flokkum um árabil. Hún keppir nú í fullorðinsflokk með landsliðinu. Þetta er í þriðja sinn sem hún er valin taekwondokona ársins.
Síðastliðið ár keppti Ingibjörg á sex sterkum alþjóðlegum mótum, þar á meðal HM í Kóreu, EM unglinga á Kýpur og NM í Danmörku. Árangur Ingibjargar var mjög góður á árinu og hennar besti hingað til. Ingibjörg er Norðurlandameistari í sínum flokki og náði hún einnig gullverðlaunum á Scandinavian Open í Danmörku í haust. Einnig var hún hársbreidd frá því að ná verðlaunasæti á EM unglinga í Kýpur þar sem einungis munaði einu stigi að hún kæmist í úrslitakeppni um verðlaunasæti.
Ingibjörg æfir nú stíft alla daga vikunnar í undirbúningi fyrir síðasta úrtökumótið fyrir Ólympíuleikana í London á næsta ári en með góðum árangri þar gæti hún tryggt sér sæti á leikunum.
Daníel Jens hefur verið í fremstu röð taekwondo manna á Íslandi um árabil, er fastamaður í landsliðinu og hefur unnið til fjölda verðlauna.
Daníel var frá æfingum með landsliðinu fyrri hluta ársins en kom mjög sterkur inn á haustmánuðum. Hann keppti á mjög sterku móti, Scandinavian Open í Danmörku þar sem hann vann gull og var jafnframt valinn maður mótsins.
Daníel er yfirþjálfari taekwondodeildar Umf. Selfoss.