Knattspyrnukonan Dagný Brynjarsdóttir hefur skrifað undir samning við knattspyrnudeild Selfoss sem gildir út tímabilið 2026.
Dagný spilaði síðast með Selfossi sumarið 2020 en síðan þá hefur hún leikið með West Ham á Englandi. Hún hefur verið lykilleikmaður í íslenska landsliðinu undanfarin ár en hún spilaði síðast með liðinu á EM síðasta sumar, áður en hún fór í fæðingarorlof en hún eignaðist sitt þriðja barn fyrr á þessu ári. Hún á að baki 122 landsleiki og í þeim hefur hún skorað 38 mörk.
„Við erum virkilega ánægð með að fá Dagnýju til liðs við okkur út tímabilið. Hún hefur æft með okkur og það sést strax hversu mikla hæfileika hún hefur. Hún hefur líka fallið mjög vel inn í hópinn. Hún er að vinna sig smám saman aftur í fullt leikform, þannig að við tökum þetta skref fyrir skref,” segir Jonathan Glenn, þjálfari meistaraflokks kvenna, í tilkynningu frá Selfyssingum.
Þegar sex umferðir eru eftir af 1. deildinni er Selfoss í 4. sæti deildarinnar með 19 stig, fjórum stigum á eftir KR sem er í 2. sæti.