Knattspyrnukonan Dagný Brynjarsdóttir frá Hellu er í hópi 31 leikmanns sem samtök knattspyrnuþjálfara í Bandaríkjunum hafa tilnefnt í kjöri um besta leikmann bandaríska háskólaboltans.
Sigurvegarinn verður útnefndur þann 10. janúar næstkomandi og hlýtur hann Hermann-bikarinn. Dagný var önnur af tveimur leikmönnum Florida State háskólans sem voru tilnefndir en hún skoraði níu mörk og lagði upp níu á síðustu leiktíð.
Dagný er uppalin hjá Knattspyrnufélagi Rangæinga en hún gekk í raðir Vals árið 2007 þar sem hún hefur fjórum sinnum orðið Íslandsmeistari.
mbl.is greindi frá þessu