Dagný aftur til Portland Thorns

Knattspyrnukonan Dagný Brynjarsdóttir hefur gengið aftur til liðs við Portland Thorns í bandarísku atvinnumannadeildinni.

Greint var frá félagaskiptunum á dögunum og Portland Thorns hefur nú staðfest þau.

Dagný spilaði með Portland Thorns tímabilin 2016 og 2017 en tók sér svo frí frá knattspyrnuiðkun í kjölfarið þar sem hún eignaðist sitt fyrsta barn.

Dagný, sem er 27 ára, skipti yfir í Selfoss í fyrrasumar en spilaði ekkert með liðinu í Pepsideildinni vegna bakmeiðsla sem höfðu verið að plaga hana í nokkurn tíma.

Keppnistímabilið í Bandaríkjunum hefst í mars næstkomandi og tilkynnti Dagný á Twittersíðu Portland Thorns í gær að öll fjölskyldan myndi flytja til Portland og hún væri mjög spennt að klæðast treyju félagsins á nýjan leik.