Ægismenn eru í ágætri stöðu eftir fyrri leikinn gegn Kormáki/Hvöt í undanúrslitum 4. deildar karla. Liðin mættust á Blönduósi í dag og skildu jöfn 1-1.
Það var rok og bleyta á Blönduósi í dag og hafði vindurinn talsverð áhrif á leikinn.
Heimamenn komust yfir á 13. mínútu en Zoran Cvitkovac, markvörður Ægis, jafnaði metin á 30. mínútu. Hann tók útspark og boltinn fór yfir endilangan völlinn, skoppaði yfir markvörð Kormáks/Hvatar og í netið, 0-1. Staðan var 1-1 í leikhléi.
Ægismenn léku megnið af seinni hálfleiknum manni fleiri eftir að Francisco Tovar, markaskorari Kormáks/Hvatar, fékk rauða spjaldið á 55. mínútu.
Ægi tókst þó ekki að nýta liðsmuninn en þremur mínútum fyrir leikslok fengu þeir vítaspyrnu. Þorkell Þráinsson, fyrirliði, fór á vítapunktinn en skaut framhjá.
Seinni leikur liðanna verður í Þorlákshöfn kl. 17:00 á miðvikudag og þá ræðst hvort liðanna tryggir sér sæti í 3. deildinni að ári.