Chris Caird tekur við Selfossliðinu

Chris Caird er nýr þjálfari Selfossliðsins sem áður lék undir merkjum FSU. Ljósmynd/Aðsend

Körfuknattleiksfélag Selfoss hefur ráðið Chris Caird sem aðalþjálfara fyrir lið félagsins í 1. deild karla. Skrifað var undir tveggja ára samning þess efnis um helgina.

Chris mun einnig aðstoða aðalþjálfara Akademíu félagsins við Fjölbrautaskóla Suðurlands og stjórna unglingaflokki karla.

Í frétt frá félaginu segir að eftir sex ára tímabil með erlenda þjálfara hafi verið ákveðið að leita inn á við til að styrkja grunngildin og félagsandann, blása í glæður metnaðar og samheldni.

Með þessari ráðningu er farið inn að hjartarótum félagsins, en Chris fékk sitt körfuboltauppeldi á fyrstu árum Akademíu FSu, áður en hann fór til Bandaríkjanna þar sem hann lék við góðan orðstír í háskólaboltanum. Eftir útskrift þar vestra kom hann heim og lék eitt tímabil með FSU í Dóminósdeildinni en hefur undanfarin tvö ár verið á mála hjá Tindastóli, nú síðast sem aðstoðarþjálfari meistaraflokks, eftir að meiðsli settu strik í reikninginn hjá honum sem leikmaður.

Chris hefur ekki reynslu sem aðalþjálfari í meistaraflokki en hann hefur þjálfað yngri flokka með góðum árangari, leikið undir leiðsögn færustu þjálfara hér heima og í USA, en það sem félagið horfir fyrst og fremst til er gríðarlegur metnaður hans til að ná árangri, elja og vinnusemi og, síðast en ekki síst, smitandi jákvætt hugarfar og góð nærvera. Hann þekkir félagið út og inn og félagið hann sömuleiðis.