Bryndís Embla Einarsdóttir, Umf. Selfoss, er einn af fimm íslenskum keppendum á heimsmeistaramóti U20 í frjálsum íþróttum sem fram fer á Hayward Field í Eugene í Oregonfylki í Bandaríkjunum dagana 5.–9. ágúst.
Bryndís Embla keppir í spjótkasti. Undankeppnin fer fram föstudaginn 7. ágúst og úrslitin sunnudaginn 9. ágúst.
Bryndís er yngsti keppandinn í íslenska hópnum, fædd árið 2009, og keppir því við allt að tveimur árum eldri keppendur. Hún kemur til Oregon eftir flottan árangur á EM U18 í Rieti, þar sem hún hafnaði í fjórða sæti.
Á mótinu koma saman yfir 1.700 af efnilegustu frjálsíþróttamönnum heims frá nærri 200 þjóðum. Auk Bryndísar Emblu keppa þau Ísold Sævarsdóttir, Christina Alba Marcus Hafliðadóttir, Eir Chang Hlésdóttir og Kjartan Óli Bjarnason fyrir Íslands hönd.