Bryndís Embla Einarsdóttir, Umf. Selfoss, náði frábærum árangri á Evrópumeistaramóti U18 í frjálsum íþróttum í Rieti á Ítalíu um síðustu helgi þegar hún hafnaði í 4. sæti í spjótkasti.
Bryndís Embla tryggði sér örugglega sæti í úrslitakeppni spjótkastsins þegar hún kastaði 55,96 metra, sem var lengsta kast undankeppninnar.
Í úrslitunum kastaði Bryndís lengst 53,34 metra í fimmtu umferð og hafnaði í 4. sæti. Hún var aðeins 2,38 metrum frá bronsverðlaunum.
„Ég mætti til leiks í úrslitin með lengsta kastið en endaði í fjórða sæti með kasti sem er fjórum metrum undir mínum besta árangri. Ég var miður mín eftir síðasta kastið því mér hafði ekki tekist að sýna mitt besta eða láta drauminn um Evrópumeistaratitil í flokki U18 rætast. En ég er ótrúlega þakklát fyrir tækifærið að keppa á Evrópumeistaramótinu og mæta svona mörgum hæfileikaríkum og góðum stúlkum,“ sagði Bryndís Embla í Instagramfærslu eftir mótið.