Bryndís Embla Einarsdóttir, Umf. Selfoss, varð í 16. sæti í spjótkasti á heimsmeistaramóti U20 í frjálsum íþróttum sem fram fór í Eugene í Oregonfylki Bandaríkjanna í síðustu viku.
Bryndís Embla gerði ógilt í fyrsta kasti, kastaði svo 47,62 m í öðru kasti og í því þriðja bætti hún um betur og kastaði 48,64 m. Tólf efstu keppendurnir komust í úrslit og var Bryndís aðeins 45 sentimetrum frá því að tryggja sér sæti meðal tólf bestu U20 í heiminum.
Þetta er frábær árangur hjá Bryndísi Emblu, sem kom inn á mótið með 23. besta árangur keppendanna. Hún var meðal yngstu keppendanna í spjótkastinu en Bryndís verður 17 ára í lok nóvember og fær því vonandi tækifæri til að spreyta sig aftur á þessu móti eftir tvö ár.