Brúarhlaupið flutt fram í ágúst

Frjálsíþróttadeild Umf. Selfoss, eigandi og framkvæmdaraðili Brúarhlaups Selfoss, hefur ákveðið að færa hlaupið frá hefðbundinni dagsetningu í september, fram til laugardagsins 9. ágúst í ár.

Hlaupið verður því sama dag og bæjarhátíðin Sumar á Selfossi, fer fram ásamt því sem Olísmótið er sömu helgi.

Að sögn Helga S. Haraldssonar, formanns frjálsíþróttadeildarinnar, er einnig verið að vinna í því að í ár verði teknar í gagnið nýjar hlaupaleiðir sem reynt verður að hafa sem mest innanbæjar á Selfossi. Fleiri breytingar og nýjungar er einnig verið að skoða en undanfarin ár hefur átt sér stað mikil uppbygging á göngustígakerfi Selfossbæjar og bíður það uppá þennan möguleika.

Helgi segir það von framkvæmdaaðila hlaupsins að þessar breytingar verði til þess að auka enn frekar áhuga og þátttöku í Brúarhlaupi Selfoss og skapa enn frekari stemmingu bæjarbúa fyrir þátttöku og stuðningi við hlaupið.