Selfyssingar hafa samið við Norðmanninn Endre Ove Brenne um að leika með liðinu í 1. deild karla í knattspyrnu í sumar.
„Þessi drengur hefur margt til brunns að bera og ber af sér góðan þokka. Við erum sammála um að hann muni styrkja okkar lið, hann er í góðu ásigkomulagi og lítur út fyrir að vera virkilega góður persónuleiki,“ sagði Logi Ólafsson, þjálfari Selfoss, í samtali við sunnlenska.is.
Brenne hefur verið til reynslu hjá Selfyssingum síðustu daga og hefur staðið sig vel á æfingum. Hann 23 ára gamall og hefur m.a leikið með FF Lillehammer og Os Turn í norsku 2. deildinni.
Leikmaðurinn getur spilað bæði í vörn og á miðju og segir Logi það ótvíræðan kost en eins og staðan sé í dag sé hann hugsaður sem miðjumaður. „Kosturinn við hann er að hann getur brugðið sér í allra kvikinda líki og spilað í öllum stöðum bæði á miðju og í vörn. Við erum ágætlega mannaðir í þessum stöðum þegar allir eru heilir en við megum ekki við neinum áföllum og þurfum að breikka hópinn,“ sagði Logi ennfremur.
Til stóð að Brenne spilaði æfingaleik með Selfyssingum gegn FH nk. laugardag. Hann þurfti hins vegar að hverfa af landi brott vegna veikinda í fjölskyldunni en skrifaði undir samning við Selfoss áður.