Knattspyrnudeild Selfoss hefur fengið heimamanninn Þorlák Breka Baxter að láni frá Stjörnunni og mun hann leika með Selfyssingum í 2. deildinni í sumar.
Breki er 19 ára gamall og hefur leikið 66 meistaraflokksleiki, þar af 48 leiki með Selfoss. Hann lék 16 leiki með liðinu í Lengjudeildinni í fyrra og skoraði þrjú mörk, áður en hann gekk í raðir Lecce á Ítalíu. Breki er fjölhæfur leikmaður sem getur leyst margar stöður framarlega á vellinum.
Í vor kom hann heim frá Ítalíu og samdi við úrvalsdeildarlið Stjörnunnar. Hann skoraði annað marka Stjörnumanna í 2-1 bikarsigri gegn Augnabliki í gærkvöldi en eftir leik tók hann upp pennann og skrifaði undir lánssamning við Selfoss.