Selfoss fékk Hvíta riddarann í heimsókn í 2. deild karla í knattspyrnu í dag. Hinum svokallaða Kótelettuleik lauk með 2-2 jafntefli.
Það var lítið að frétta framan af leik, Selfoss var meira með boltann en náði ekki að skapa sér nein alvöru færi. Þeir fengu hins vegar blautan grillhanska í andlitið á 28. mínútu þegar Hvíti riddarinn komst yfir eftir snarpa sókn. Selfyssingar hresstust aðeins í kjölfarið en tókst ekki að nýta færin og staðan var 0-1 í hálfleik.
Það var allt annað að sjá til Selfyssinga í upphafi seinni hálfleiks og eftir sjö mínútur tókst Aroni Lucas Vokes að skora gott mark. Mínútu síðar var Jón Daði Böðvarsson togaður niður í vítateig andstæðinganna og Selfoss fékk víti. Viðar Örn Kjartansson fór á punktinn og skoraði af öryggi.
Selfoss hafði öll völd í kjölfarið en tókst ekki að halda forystunni. Á 77. mínútu jafnaði Hvíti riddarinn metin eftir skyndisókn og staðan orðin 2-2. Þau urðu úrslit leiksins en Selfoss sótti stíft á lokakaflanum án þess að ná að skora.
Selfoss er í 3. sæti deildarinnar með 20 stig, jafnmörg stig og Dalvík/Reynir sem er í 2. sæti en á leik til góða. Hvíti riddarinn er í 9. sæti með 13 stig.