Selfoss vann góðan og nauðsynlegan sigur á Þrótti Vogum í 2. deild karla í knattspyrnu í dag, 1-3 í Vogunum.
Viðar Örn Kjartansson kom Selfyssingum yfir með marki af vítapunktinum á 19. mínútu en tæpum tíu mínútum síðar jöfnuðu Þróttarar og staðan var 1-1 í hálfleik.
Elías Karl Heiðarsson kom inn á sem varamaður í leikhléinu og hann lét strax að sér kveða, kom Selfyssingum yfir á 54. mínútu. Það var svo Viðar Örn sem innsiglaði 1-3 sigur Selfoss með góðu marki á 81. mínútu.
Kári vann sinn leik sömuleiðis í dag þannig að baráttan um 2. sætið er óbreytt. Selfoss er í 2. sæti með 36 stig en Kári þremur stigum á eftir í 3. sætinu. Önnur lið hafa stimplað sig út úr baráttunni um 2. sætið.