Fyrstudeildarlið Ægis tók á móti Bestudeildarliði Breiðabliks í 8-liða úrslitum bikarkeppni karla í knattspyrnu á Þorlákshafnarvelli í dag. Þrátt fyrir fína frammistöðu Ægis unnu Blikar öruggan 0-3 sigur.
Breiðablik komst yfir strax á 8. mínútu þegar Stefan Dabetic varð fyrir því óláni að setja boltann í eigið net. Bæði lið áttu álitlegar sóknir eftir það en Blikar skoruðu aftur á 41. mínútu og staðan var 0-2 í hálfleik.
Ægir átti ágætar sóknir í upphafi seinni hálfleiks en enn og aftur voru það Blikar sem komu boltanum í netið. Þeir skoruðu gott mark á 62. mínútu og staðan orðin 0-3. Ægismenn gerðu vel í framhaldinu og voru nær því að skora á lokakaflanum en inn vildi boltinn ekki og bikarævintýri þeirra gulu því lokið.
Það var bongóblíða í Höfninni og 225 áhorfendur mættu á leikinn sem spilaður var við toppaðstæður á grasinu í Þorlákshöfn.