Selfoss tók á móti Breiðabliki þegar keppni hófst í 1. deild kvenna í körfubolta í gærkvöldi. Blikar höfðu undirtökin lengst af leiknum og sigruðu að lokum 71-79.
Breiðablik byrjaði betur og leiddi 16-26 eftir 1. leikhluta. Munurinn breyttist ekki í 2. leikhluta og staðan var 34-44 í hálfleik.
Selfyssingar komu sterkir inn í seinni hálfleikinn, léku vel á báðum endum vallarins og náðu að komast yfir undir lok 3. leikhluta. Staðan var 61-57 þegar sá fjórði hófst. Í 4. leikhluta náði Breiðablik forystunni strax aftur og hélt henni allt til leiksloka.
Valdís Una Guðmannsdóttir var stigahæst Selfyssinga með 19 stig, 7 fráköst og 7 stolna bolta, Heiður Hallgrímsdóttir og Anna Katrín Víðisdóttir skoruðu báðar 12 stig og tóku 7 fráköst, Eva Rún Dagsdóttir skoraði 10 stig og sendi 6 stoðsendingar, Perla María Karlsdóttir skoraði 9 stig, Sigríður Svanhvít Magnúsdóttir 7 og Andrea Líf Gylfadóttir 2.