Björn Sigurbjörnsson hefur verið ráðinn þjálfari kvennaliðs Selfoss í knattspyrnu en hann skrifaði undir þriggja ára samning við félagið í gærkvöldi.
Björn tekur við starfinu af Alfreð Elíasi Jóhannssyni, sem sagði starfi sínu lausu að loknu nýafstöðu keppnistímabili, eftir fimm ár í brúnni á Selfossi.
Í tilkynningu frá Selfyssingum segir að þar á bæ séu miklar vonir bundnar við ráðningu hans. Björn hefur verið aðstoðarþjálfari meistaraflokks kvenna hjá Kristianstads í Svíþjóð undanfarin tíu ár og tekið þátt í uppbyggingu yngri flokka starfs félagsins frá árinu 2015. Áður en hann hélt erlendis hafði hann verið aðstoðarþjálfari bæði hjá karla- og kvennaliðum Víkings og þjálfað yngri flokka hjá Víkingi, Þrótti R, Fram og Val.
Spennandi tímar framundan
„Ég er rosalega spenntur fyrir því að koma á Selfoss og hefja störf þar. Selfoss er félag sem passar vel við mínar hugmyndir sem þjálfari, félagið hefur metnað fyrir því að koma eins mörgum uppöldum leikmönnum og hægt er upp í meistaraflokkinn og búa til góða blöndu af uppöldum leikmönnum og aðkomuleikmönnum. Það er mikil gróska í bæjarlífinu og íþróttalífinu á Selfossi, þannig að það eru vonandi mjög spennandi tímar framundan,“ segir Björn í fréttatilkynningu frá Selfossi.
„Ég hef aldrei sleppt takinu af því að vera yngriflokkaþjálfari, þó svo að ég hafi verið að vinna í úrslitamiðuðu umhverfi með meistaraflokksliði Kristianstads, þannig að ég hlakka mikið til að taka þátt í uppbyggingunni sem hefur átt sér stað á Selfossi undanfarin ár undir handleiðslu Alfreðs. Markmið komandi ára hlýtur alltaf að vera að gera betur en á síðasta tímabili, þannig að maður stígi skref í rétta átt á hverju ári. Mín markmið sem þjálfari er að reyna að hjálpa sem flestum leikmönnum liðsins að bæta sig og verða betri leikmenn. Ef það tekst munu úrslitin vonandi fylgja í kjölfarið. Það eru ákveðnar stöður í liðinu sem þarf að styrkja og ef okkur tekst vel til þar þá held ég að liðinu verði allir vegir færir og að við verðum lið sem verður erfitt að mæta,“ segir Björn ennfremur.
Auk þess að þjálfa kvennalið Selfoss verður Björn þjálfari hjá Knattspyrnuakademíu Íslands í Fjölbrautaskóla Suðurlands.