Björn Bjarndal Jónsson, fyrrverandi formaður Héraðssambandsins Skarphéðins og Ungmennafélags Íslands, var sæmdur gullmerki Frjálsíþróttasambands Íslands á 65. Frjálsíþróttaþingi FRÍ sem haldið var um helgina.
Alls var 31 einstaklingur heiðraður á frjálsíþróttaþinginu fyrir mikilvægt framlag til frjálsíþróttahreyfingarinnar og Björn var alls ekki eini Sunnlendingurinn sem var heiðraður. ÍR-ingurinn Pétur Guðmundsson frá Tungu í Flóahreppi og Ármenningurinn Örvar Ólafsson frá Stóru-Hildisey í Austur-Landeyjum voru einnig sæmdir gullmerki.
Guðmunda Ólafsdóttir, formaður frjálsíþróttaráðs HSK, var sæmd silfurmerki og þeir Ástþór Jón Ragnheiðarsson, formaður Umf. Heklu og Teitur Ingi Valmundsson, formaður frjálsíþróttadeildar Aftureldingar, frá Flagbjarnarholti í Holta- og Landsveit voru sæmdir eirmerki.
