Bjarni Jóhannsson er hættur sem þjálfari karlaliðs Selfoss í knattspyrnu en knattspyrnudeild Selfoss og Bjarni hafa komist að samkomulagi um að endurnýja ekki samning sinn.
Bjarni tók við liði Selfoss haustið 2023 og kom liðinu upp úr 2. deildinni með mjög svo sannfærandi hætti á sínu fyrsta tímabili, sumarið 2024. Þá stóð liðið uppi sem sigurvegari í bikarkeppni neðrideildaliða og fagnaði sigri á Laugardalsvellinum. Sumarið í sumar var vonbrigðasumar en liðið féll úr 1. deildinni og leikur í 2.deild að ári.
„Ég vil koma á framfæri innilegum þökkum til Selfyssinga. Takk fyrir samstarfið og stuðninginn á þessum tíma sem ég hef verið þjálfari. Það hefur verið heiður að vinna með ykkur öllum og eftir sitja fullt af frábærum minningum. Ég óska ykkur alls hins besta í framtíðinni,“ segir Bjarni í tilkynningu frá knattspyrnudeild Selfoss. Þar kemur fram að leit að nýjum þjálfara liðsins sé þegar hafin.