Bjarni Bjarnason íþróttamaður Bláskógabyggðar 2018

Ljósmynd/Bláskógabyggð

Hestamaðurinn Bjarni Bjarnason, Hestamannafélaginu Trausta, var valinn íþróttamaður Bláskógabyggðar árið 2018. Hóf til heiðurs íþróttafólki í Bláskógabyggð var haldið á Laugarvatni í síðustu viku.

Tveir knapar voru tilnefndir til íþróttamanns ársins, Bjarni Bjarnason, ættaður frá Þóroddsstöðum, en hann er félagi í Hestamannafélaginu Trausta og Finnur Jóhannesson frá Brekku, sem keppir fyrir Hestamannafélagið Loga.

Bjarni stóð sig mjög vel á flestum þeim mótum sem hann keppti í á síðasta ári og þá sérstaklega í skeiðgreinum. Þetta er þriðja árið í röð og fjórða skiptið alls sem Bjarni er valinn íþróttamaður Bláskógabyggðar.

Þá voru fjögur ungmenni heiðruð við þetta tækifæri fyrir að hafa náð Íslands- og eða bikarmeistaratitli á árinu 2018. Þau eru Brynjar Logi Sölvason fyrir Íslandsmeistaratitil í hástökki, Ólafur Magni Jónsson fyrir Íslandsmeistaratitla í kúluvarpi og sleggjukasti og bikarmeistaratitil í kringlukasti, Jóna Kolbrún Helgadóttir fyrir Íslands- og bikarmeistaratitla í 4×200 m boðhlaupi og Dagur Úlfarsson fyrir bikarmeistaratitil í 9. flokki drengja í körfubolta. Þá var Jana Lind Ellertsdóttir heiðruð fyrir framúrskarandi árangur í glímu og öðrum fangbrögðum.

Æskulýðsnefnd Bláskógabyggðar hafði veg og vanda af undirbúningi og framkvæmd hófsins.