Bjarki Már Elísson skoraði 4 mörk fyrir Ísland sem vann öruggan sigur á Marokkó í kvöld á heimsmeistaramótinu í handbolta.
Bjarki Már náði þeim skemmtilega áfanga í leiknum að skora sitt 200. mark fyrir íslenska landsliðið. Elvar Örn Jónsson var besti varnarmaður vallarins í kvöld en hann skoraði að auki tvö mörk og sendi þrjár stoðsendingar.
Ómar Ingi Magnússon var hvíldur í leiknum og Janus Daði Smárason mun ekki leika meira á HM en hann var sendur heim í gær vegna axlarmeiðsla.
Íslendingar voru mun sterkari aðilinn í kvöld, staðan í hálfleik var 15-10 og lokatölur urðu 31-23.
Íslendingar eru því komnir í milliriðil þar sem þeir mæta Sviss, Noregi og Frakklandi.