Selfyssingurinn Bergrós Björnsdóttir verður meðal keppenda á heimsleikunum í CrossFit í ár. Hún fékk tíðindin staðfest seint í gærkvöldi þegar endanleg lokastaða úr síðasta undanúrslitamótinu var gefin út.
Bergrós endaði þar í sjöunda og síðasta sætinu sem gaf þátttökurétt á heimsleikunum sem fara fram í San Jose í Kaliforníu í Bandaríkjunum 24.-26. júlí næstkomandi.
Þetta er í fyrsta sinn sem Bergrós keppir á heimsleikum í flokki fullorðinna og hún er verður eini Íslendingurinn í einstaklingskeppninni. Bergrós hefur áður keppt í flokki unglinga og vann bronsverðlaun í 16-17 ára flokki árið 2023.
Þátttaka Bergrósar á heimsleikunum í ár var í lausu lofti þangað til í gær. Hún var í 9. sæti í undankeppninni en hækkaði um tvö sæti eftir að tveir keppendur fyrir ofan hana fengu refsingu. Keppendur þurftu að skila myndböndum með æfingum sínum í gegnum netið og þau voru síðan yfirfarin. Bergrós fékk allar sínar æfingar samþykktar en mistök tveggja keppinauta hennar urðu til þess að þær hrundu niður listann og Bergrós færðist upp.
Aðeins 30 konur komast inn á heimsleikana þannig að Bergrós fær hörkusamkeppni en keppendurnir í kvennaflokki koma frá 11 þjóðum. Heimsleikarnir í ár verða þeir tuttugustu í sögunni og hefur CrossFit gefið út að þetta verði stærstu og jafnframt lang erfiðustu leikarnir hingað til.
Bergrós verður ekki eini Sunnlendingurinn á heimsleikunum því eitt alíslenskt lið mun taka þátt í liðakeppni leikanna og meðal liðsmanna þess er Hvergerðingurinn Guðbjörg Valdimarsdóttir.