Kvennalið Selfoss í knattspyrnu er komið í undanúrslit Mjólkurbikarsins eftir góðan sigur á HK/Víkingi á Selfossvelli í dag.
Lokatölur urðu 2-0 en Barbára Sól Gísladóttir skoraði bæði mörk Selfoss á 71. og 74. mínútu. Leikurinn var jafn fram að því, fyrri hálfleikur var frekar bragðdaufur en í seinni hálfleik færðist fjör í leikinn. Nokkuð dró af gestunum þegar leið á leikinn en Selfyssingar spiluðu af krafti og kláruðu vel.
Dregið verður í undanúrslit á mánudag en auk Selfyssinga eru Þór/KA, Fylkir og KR í pottinum.