Þór Þorlákshöfn vann mikilvægan sigur á ÍR í úrvalsdeild karla í körfubolta í kvöld og lyfti sér þar með úr fallsæti. Lokatölur í Breiðholtinu urðu 75-78.
Leikurinn var jafn í 1. leikhluta en Þórsarar náðu að byggja upp forskot í 2. leikhluta og leiddu 34-43 í hálfleik.
ÍR-ingar gerðu áhlaup í 3. leikhluta en Þórsarar stóðu af sér storminn og staðan var 57-62 þegar síðasti fjórðungurinn hófst. Þór leiddi allan 4. leikhlutann en ÍR var aldrei langt undan og heimamennirnir náðu að minnka muninn í 2 stig á lokamínútunni. Þórsarar voru hins vegar baráttuglaðir og lönduðu góðum sigri.
Dachon Burke, nýr leikmaður Þórs, lét mikið til sín taka; skoraði 23 stig, tók 7 fráköst og stal 7 boltum. Hann var framlagshæstur ásamt Djordje Dzeletovic sem skoraði 15 stig og tók 9 fráköst.
Þórsarar eru í 10. sæti deildarinnar með 10 stig en ÍR er í 7. sæti með 14 stig.
ÍR-Þór Þ. 75-78 (20-19, 14-24, 23-19, 18-16)
Tölfræði Þórs Þ: Dachon Burk 23/7 fráköst/5 stoðsendingar/7 stolnir, Rafail Lanaras 16/7 fráköst, Djordje Dzeletovic 15/9 fráköst, Emil Karel Einarsson 14/5 fráköst, Lazar Lugic 8/9 fráköst, Davíð Arnar Ágústsson 2.