Baldur Þór nýr þjálfari Tindastóls

Baldur handsalar samninginn. Ljósmynd/Tindastóll

Körfuknattleiksdeild Tindastóls hefur ráðið Ölfusinginn Baldur Þór Ragnarsson sem þjálfara meistaraflokks karla.

Baldur þjálfaði uppeldisfélag sitt, Þór Þorlákshöfn, í vetur með eftirtektarverðum árangri.

Samningurinn er til þriggja ára og mun Baldur jafnframt hafa yfirumsjón með styrktarþjálfun meistaraflokks kvenna og karla.

„Það er mjög spennandi og krefjandi verkefni að taka við Tindastóls liðinu. Hér hefur verið vandað til verka í mörg ár og hlakka ég til að setja minn brag á liðið. Góðir leikmenn hafa komið upp í gegnum starfið hér seinustu ár og það verður gaman að vinna að því að koma fleiri leikmönnum upp í meistaraflokkinn í samvinnu við þjálfara yngri flokkana. Þjálfun meistaraflokks Tindastóls verður bæði krefjandi og skemmtilegt. Ég hef mína hugmyndafræði sem ég vil koma í framkvæmd. Við viljum leggja mikið á okkur, búa til sterka menningu innan liðsins, vera einbeittir, ákveðnir en jafnframt óeigingjarnir og setja liðið og liðsheildina framar öllu. Það er mikil tilhlökkun að koma inn í þetta körfuboltasamfélag sem Sauðárkrókur er og hlakka ég mikið til samstarfsins með leikmönnum, sjálfboðaliðum og ekki síst stuðningsmönnum,“ sagði Baldur Þór við undirritun samningsins.

Baldur Þór mun einnig verða yfirþjálfari yngri flokka Tindastóls ásamt því að stýra körfuboltaakademíu Tindastóls og Fjölbrautaskóla Norðurlands vestra.