Baldur Haraldsson og Aðalsteinn Símonarson tryggðu sér Íslandsmeistaratitilinn í rallý síðastliðinn laugardag, þegar lokaumferð Íslandsmótsins fór fram á Suðurlandi.
Eknar voru fjórar sérleiðir um Skjaldbreiðarveg og Kaldadal. Spennan var mikil því ljóst var að í lok dags myndu úrslit um Íslandsmeistaratitla ráðast í þremur flokkum, jeppa-, non-turbo- og heildarkeppninni en í þeim flokki teljast allir þeir bílar sem keppa, óháð afli og útbúnaði.
Mikið hafði rignt dagana fyrir keppni og eins var á keppnisdaginn, auk þess sem all hvasst var. Aðstæður voru því erfiðar, vegir bæði mjúkir og ósléttir en keppendur létu það ekki á sig fá enda dýrmæt stig í boði. Barist var af öllu afli en andstætt síðustu umferð var einungis ein áhöfn sem ekki lauk keppni.
Úrslit fóru þannig að Daníel og Ásta Sigurðarbörn unnu með yfirburðum á nýjum Subaru bíl sínum. Þau voru rúmum sex mínútum á undan Baldri og Aðalsteini en annað sætið dugði þeim til sigurs á Íslandsmótinu. Í þriðja sæti í keppninni lentu Henning Ólafsson og Árni Gunnlaugsson en þeir hafa lent í miklum hrakföllum í sumar.
Í jeppaflokki urðu Þorkell Símonarson og Anna María Sighvatsdóttir stigahæst og því meistarar en þess má geta að þetta er fyrsta keppnissumar Önnu Maríu.
Í flokki non-turbo sigruðu þau Baldur Arnar Hlöðversson og Hanna Rún Ragnarsdóttir eftir harða baráttu við hjónin Ólaf Þór Ólafsson og Tinnu Rós Vilhjálmsdóttur. Draumur Óla og Tinnu varð að engu eftir að dekk sprakk á þriðju sérleið. Þau Baldur og Hanna Rún létu meistaratitil ekki nægja heldur óku þau einnig til góðs, en fyrir keppni söfnuðu þau áheitum fyrir hvern ekinn kílómeter. Var það til styrktar Bleiku Slaufunni og hafa nú þegar safnast 100 þús. Hægt er að styrkja söfnunina til 21. október á reikninginn 0324-26-042709, kennitala 221294-2709