Afreksfólk Hveragerðisbæjar í íþróttum var heiðrað við hátíðlega athöfn í Listasafni Árnesinga á þrettándanum þar sem körfuknattleikskonan Ása Lind Wolfram var kjörin íþróttamaður ársins 2025.
Ása Lind er uppalin hjá Hamri í Hveragerði en undanfarin ár hefur hún spilað með liði Aþenu. Síðastliðið sumar var Ása Lind valin í U-20 ára landslið Íslands í körfubolta sem spilaði í A deild Evrópumótsins. Liðið náði frábærum árangri og komst í 8 liða úrslit A deildar, en liðið var í fyrsta sinn að spila í deild hinna bestu. Ása Lind var einn af lykilleikmönnum liðsins sem náði þessum sögulega árangri.
Í sumar gerði hún samning við Idaho State í bandaríska háskólaboltanum. Þar stundar hún nám og spilar körfubolta við bestu aðstæður í Big Sky hluta 1. deildar bandaríska háskólaboltans.
Átta íþróttamenn voru tilnefndir í kjörinu en auk Ásu Lindar voru það Úlfur Þórhallsson, badminton, Hafsteinn Valdimarsson, blak, Brynjar Óðinn Atlason, knattspyrna, Atli Þór Jónasson, knattspyrna, Anna Guðrún Halldórsdóttir, lyftingar, Eric Máni Guðmundsson, motocross og Guðbjörg Valdimarsdóttir, crossfit.
Við sama tækifæri voru veittar viðurkenningar til íþróttafólks sem hefur skarað fram úr á liðnu ári með stórum titlum eða þátttöku í landsliðum Íslands.
