Það var frábær stemning á Sviðinu og víðar í miðbæ Selfoss síðastliðinn sunnudag þar sem stuðningsmenn Arsenal komu saman og fögnuðu því að félagið vann enska meistaratitilinn í fyrsta skipti í 22 ár.
Að sögn Kjartans Björnssonar, stofnanda og fyrrverandi formanns Arsenalklúbbsins á Íslandi, voru um 250 stuðningsmenn Arsenal samankomnir í miðbænum. Gleðin var einlæg þegar bikarinn fór loksins á loft, það var fjölskyldustemning á svæðinu og allir glaðir og kátir í hjarta.
Arsenal lék gegn Crystal Palace í lokaumferðinni og leikurinn var í beinni á Sviðinu. Í hálfleik steig Kjartan Adolfsson, gjaldkeri Arsenalklúbbsins, á stokk og heiðraði Björn Inga Gíslason, Bjössa rak, en hann var gerður að heiðursfélaga Arsenalklúbbsins á Íslandi.
