Selfoss sigraði Dalvík/Reyni, 2-1, í gríðarlega mikilvægum leik í 2. deild karla í knattspyrnu á Selfossvelli í kvöld.
Leikurinn byrjaði fjörlega og strax á 8. mínútu kom Aron Lucas Vokes Selfyssingum yfir með hnitmiðuðu skoti úr teignum. Selfoss réði lögum og lofum til að byrja með og Aron Lucas var aftur á ferðinni á 23. mínútu þegar hann slapp innfyrir og skoraði af miklu öryggi. Dalvík/Reynir komst betur inn í leikinn þegar leið á fyrri hálfleikinn og þeir skoruðu gott mark á 29. mínútu. Í kjölfarið áttu bæði lið fínar sóknir en mörkin létu á sér standa og staðan var 2-1 í hálfleik.
Seinni hálfleikurinn var ekki burðugur sóknarlega hjá Selfyssingum. Dalvík/Reynir stjórnaði ferðinni en Selfossvörnin var þétt og Filip Sabatti firnasterkur á milli stanganna. Selfyssingar héldu út og fögnuðu mikilvægum sigri.
Selfoss er áfram í 2. sæti deildarinnar með 29 stig en Dalvík/Reynir er í 7. sæti með 20 stig.