Selfoss vann auðveldan sigur á Árborg í 16-liða úrslitum Gatorade bikarsins, bikarkeppni neðrideildaliða á Selfossvelli í kvöld.
Lokatölur urðu 5-0 en Selfyssingar gerðu nánast út um leikinn á fyrstu 25 mínútunum. Brynjar Bergsson kom þeim yfir með skoti af stuttu færi eftir hornspyrnu strax á 3. mínútu. Viðar Örn Kjartansson tvöfaldaði forskotið tíu mínútum síðar og Viðar var svo aftur á ferðinni á 24. mínútu. Elías Karl Heiðarsson átti lokaorðið í fyrri hálfleik en hann skoraði fjórða mark Selfoss á 39. mínútu.
Það var frábær mæting á Selfossvöll í kvöld, um þúsund manns á vellinum, en leikurinn var styrktarleikur fyrir Helgu Guðmundsdóttur, móður Arons Fannars Birgissonar leikmanns Selfoss. Fyrir leik var mínútu þögn í minningu Helgu og á 48. mínútu var leikurinn stoppaður og allir viðstaddir klöppuðu í eina mínútu. Helga var 48 ára gömul þegar hún lést síðastliðinn mánudag.
Aron Fannar kom inná sem varamaður í hálfleik og fékk hlýjar móttökur og hann toppaði síðan góðan leik með því að skora fimmta mark Selfoss á 79. mínútu.
Lokatölur 5-0 og Selfoss verður í pottinum þegar dregið verður í 8-liða úrslit Gatorade bikarsins.
