Aron Emil Gunnarsson, Golfklúbbi Selfoss, er stigameistari GSÍ mótaraðarinnar 2026. Hann kórónaði frábært sumar með 2. sæti á Íslandsmótinu í golfi sem lauk á Korpúlfsstaðavelli í gær.
Aron Emil lék í öllum sjö mótum sumarsins á mótaröðinni, var aldrei neðar en í sjöunda sæti og náði fjórum sinnum verðlaunasæti. Aron endaði með 4.178 stig, 110 stigum meira en næsti maður og vann þar með sinn fyrsta stigameistaratitil.
Það var hörkukeppni á Íslandsmótinu um liðna helgi og þar lék Aron Emil frábært golf, sérstaklega á síðustu tveimur hringjunum þar sem hann kom sér í toppbaráttuna og hélt sér þar allt til loka. Hann tapaði aðeins einu höggi á síðustu tveimur hringjunum en lauk keppni á -5 höggum og var öruggur í 2. sæti.
Á Íslandsmótinu vann Aron Emil jafnframt Björgvinsskálina, sem veitt er þeim áhugakylfingi sem leikur á lægsta skori í karlaflokki. Þetta er í annað sinn sem Aron Emil hlýtur Björgvinsskálina.
Þess má geta að Aron Emil var nú í þriðja sinn á síðustu fjórum árum í lokahollinu á lokadegi Íslandsmótsins og segir það mikið um þann stöðugleika sem hann hefur sýnt á stærsta móti ársins.