Árni Þór Grétarsson, sjálfboðaliði og lykilmaður hjá handknattleiksdeild Selfoss, var sæmdur gullmerki Ungmennafélags Selfoss og gullmerki Handknattleikssambands Íslands í kvöld, fyrir leik Selfoss og Víkings á Ragnarsmóti karla.
Fjöldi fólks lagði leið sína í Set-höllina í kvöld, bæði stuðningsmenn Selfoss og vinnufélagar Árna Þórs hjá Rarik. Salurinn heilsaði Árna með dynjandi lófataki og virkilega hlýjum móttökum en Árni glímir nú við krabbamein.
Árni Þór verið einn öflugasti sjálfboðaliði handknattleiksdeildar Selfoss síðustu ár og er hann vel að þessum viðurkenningum kominn. Hann hefur verið burðarás í handboltastarfinu á Selfossi í áratugi og hefur haft djúpstæð áhrif á fjölda ungra iðkenda sem líta upp til hans sem fyrirmynd og leiðtoga. Árni hefur aldrei leitað eftir athygli eða hrósi, heldur vinnur af hreinni elju og hjartahlýju. Með dugnaði sínum, einlægni og góðvild hefur hann haft djúpstæð áhrif á íþróttalífið á Selfossi.
Árni Þór var tilnefndur sem íþróttaeldhugi ársins hjá Íþrótta- og ólympíusambandi Íslands á síðasta ári, hann hefur í tvígang verið útnefndur félagi ársins hjá handknattleiksdeildinni og einnig hampað Björns Blöndals-bikarnum sem félagi ársins hjá Ungmennafélagi Selfoss. Þórir Haraldsson, formaður handknattleiksdeildarinnar, tilkynnti í kvöld að bikarinn fyrir félaga ársins hjá deildinni verði héðan í frá kenndur við Árna.
Það var Sverrir Einarsson, varaformaður Umf. Selfoss, sem sæmdi Árna Þór gullmerki Umf. Selfoss og Jón Halldórsson, formaður HSÍ, sæmdi hann gullmerki HSÍ.
