Arnþór kominn heim

Arnþór Tryggvason, miðherji körfuknattleiksliðs FSu mörg undanfarin ár, er kominn heim aftur og mun leika með uppeldisfélagi sínu það sem eftir lifir keppnistímabilinu.

Arnþór flutti til Reykjavíkur og ákvað í samræmi við það að breyta til í boltanum. Hann vinnur hins vegar enn á Selfossi og því hentar honum betur að taka æfingu í Iðu í lok vinnudags áður en lagt er á Heiðina.

Á heimasíðu FSu segir að Arnþór muni styrkja hið unga FSu-lið mjög, hann verði hálfgerður fornmaður í hópnum, þó aðeins 28 ára gamall, og hækka meðalhæðina sömuleiðis með sínum 200 sm – og bæta verulega úr þeim alvarlega sentimetraskorti sem hrjáð hefur liðið.