Rúmlega þriggja milljón króna hagnaður var á rekstri Golfklúbbs Þorlákshafnar á síðasta ári. Hagnaður klúbbsins hefur aldrei verið meiri þrátt fyrir að árgjöld klúbbsins séu þau lægstu á 18 holu velli á Íslandi.
Ein af megin ástæðunum fyrir þessum hagnaði er aukinn fjöldi höfuðborgarbúa sem sækja völlinn heim á hverju sumri.
Aðalfundur GÞ var haldinn í síðustu viku með hefðbundnu sniði. Guðmundur K. Baldursson formaður GÞ fór yfir skýrslu stjórnar og ársreikning klúbbsins og mikil ánægja á meðal fundargesta var með skýrsluna og ársreikninginn.
Aðeins ein breyting var á stjórn klúbbsins, en Hákon Hjartarson gaf ekki kost á sér sem varamaður og í hans stað var Óskar Logi Sigurðsson kosinn.
Árgjöld voru ákveðin þau sömu og á síðasta ári, en árgjöldin er þau lægstu sem þekkjast á Íslandi og sérstaka athygli vekur lágt nýliðagjald. Nýliðar borga aðeins 46 þúsund krónur fyrir fyrstu tvö árin í klúbbnum.
Guðlaugur Þ. Sveinsson, fyrrum formaður GÞ hlaut heiðursviðurkenningu golfklúbbsins fyrir árið 2014, en ákveðið var að veita honum viðurkenninguna fyrir frábært starf í þágu klúbbsins mörg undanfarin ár.
Unnið hefur verið að breytingum á vellinum að undanförnu og áfram verður unnið næstu tvö sumur að þeim breytingum sem í gangi eru vegna aflagningar tveggja brauta. Samkvæmt áætlun er gert ráð fyrir að ljúka sem mest af áfanga 1 á þessu ári.