Gleðin var allsráðandi í íþróttahúsinu Iðu á Selfossi síðastliðinn laugardag þegar hið árlega Guðjónsmót fór fram. Tólf lið voru skráð til leiks og keppt var í þremur riðlum áður en undanúrslit og úrslit voru spiluð.
Fjöldi stuðningsmanna og áhorfenda lagði leið sína í Iðu til þess að fylgjast með misgóðum knattspyrnutilþrifum. Í undanúrslitum mættust annars vegar Set og Kaffi Krús og hins vegar Árborgir og Myrra. Eftir spennandi undanúrslit voru það Árborgir og Kaffi Krús sem mættust í úrslitum. Leikurinn var ekki mikið fyrir augað en eftir tíu mínútur var markalaust og ekkert annað í stöðunni en að fara í vítaspyrnukeppni. Þar var markvörðurinn Þorkell Ingi Sigurðsson allt í öllu og varði tvær vítaspyrnur fyrir Árborgir sem stóðu uppi sem sigurvegarar.
Lokahóf mótsins var afar vel heppnað en það fór fram á Miðbar eftir úrslitaleikinn. Þar fékk Sóldís Malla Steinarsdóttir viðurkenningu fyrir að hafa verið eftirtektarverðasti leikmaður mótsins. Hún spilaði marga leiki, flesta í marki, og átti nokkrar stórbrotnar vörslur.