Knattspyrnufélag Árborgar vann öruggan sigur á Knattspyrnufélagi Rangæinga í 4. deild karla í knattspyrnu í kvöld. Á sama tíma gerði Hamar jafntefli við Úlfana.
Árborgarar voru í góðum gír gegn KFR á Selfossvelli í kvöld á meðan Rangæingum gekk illa að binda endahnút á sóknir sínar. Gestur Helgi Snorrason kom Árborg yfir á 8. mínútu og hann tvöfaldaði svo forskotið á 40. mínútu, 2-0 í hálfleik. David Dabrowski lék á mann og annan áður en hann skoraði þriðja markið á 65. mínútu og Þorvarður Hjaltason skoraði svo eitt af mörkum sumarsins í uppbótartímanum. Lokatölur 4-0.
Úlfarnir bundu enda á sjö leikja sigurgöngu Hamars á Framvellinum í Úlfarsárdal í kvöld. Úlfarnir komust yfir á 12. mínútu en Hvergerðingar lokuðu fyrri hálfleiknum vel og Brynjólfur Þór Eyþórsson og Rodrigo Depetris skoruðu með stuttu millibili rétt fyrir leikhlé. Staðan var 1-2 í hálfleik og þannig stóðu leikar allt þar til tvær mínútur voru eftir af leiknum að Úlfarnir jöfnuðu metin og leiknum lauk með 2-2 jafntefli.
Staðan í deildinni er þannig að Hamar er í 2. sæti með 22 stig, Árborg í 3. sæti með 19 stig og KFR í 7. sæti með 8 stig.