Lokaumferð 4. deildar karla í knattspyrnu lauk í dag en úrslitin í deildinni voru þegar ráðin. KFR tók á móti Árborg á Hellu á sama tíma og Hamar fékk Úlfana í heimsókn.
Magnús Hilmar Viktorsson kom Árborg yfir gegn KFR með glæsilegu marki strax á 6. mínútu. Staðan var 0-1 í hálfleik en Rangæingar mættu sterkir inn í seinni hálfleikinn og leituðu að jöfnunarmarki. Þeir fengu hins vegar mark í andlitið á 64. mínútu þegar Benjamín Óli Ólafsson skoraði eftir frábæran undirbúning Andrésar Karls Guðjónssonar. Þar við sat, lokatölur á Hellu 0-2.
Mörkin vantaði hins vegar ekki í Hveragerði þar sem Úlfarnir voru komnir í 0-2 eftir rúmt korter. Rodrigo Depetris minnkaði muninn á 23. mínútu en tveimur mínútum síðar skoruðu Úlfarnir aftur og breyttu stöðunni í 1-3 og þannig stóð í hálfleik. Hamarsmenn komu sér aftur inn í leikinn með öðru marki Depetris þegar rúmt korter var eftir en Úlfarnir svöruðu strax aftur með marki, sem var síðasta mark dagsins og lokatölur 2-4.
Hamarsmenn tóku við silfurverðlaununum í leikslok, þeir urðu í 2. sæti deildarinnar með 44 stig en Árborg í 3. sæti með 36 stig og KFR í 6. sæti með 18 stig.
