Árborg er úr leik í bikarkeppni karla í knattspyrnu eftir 3-2 tap gegn Víkingi Ólafsvík í framlengdum leik í Akraneshöllinni í dag.
Víkingur leikur í 2. deildinni í sumar en Árborgarar í 4. deildinni og því margir sem spáðu því að róðurinn yrði þungur fyrir Árborg í dag. Árborgarar voru þó ekkert að spá í því og Aron Freyr Margeirsson kom þeim yfir með frábæru marki á 16. mínútu. Víkingum tókst að jafna metin á 39. mínútu og staðan var 1-1 í hálfleik.
Seinni hálfleikurinn var markalaus, Víkingar voru meira með boltann en Árborgarar fengu góð færi sem nýttust ekki. Staðan var enn 1-1 eftir 90 mínútur og því blásið til framlengingar.
Það fór að færast fjör í leikinn í seinni hálfleik framlengingarinnar, Víkingur komst í 2-1 á 107. mínútu, Árborgarar færðu sig framar á völlinni í kjölfarið en fengu mark í bakið sex mínútum seinna og staðan orðin 3-1.
Tveimur mínútum síðar fékk Þorsteinn Daníel Þorsteinsson rautt spjald fyrir mótmæli og Árborgarar þá orðnir 10 gegn 11. Þrátt fyrir það áttu Árborgarar síðasta orðið en Þorkell Þráinsson minnkaði muninn á 120. mínútu með marki úr vítaspyrnu sem hann fiskaði sjálfur.