Árborg og Hamar unnu góða útisigra í 4. deild karla í knattspyrnu í kvöld á meðan KFR laut í gras á heimavelli.
Árborgarar unnu auðveldan sigur á Álafossi á Tungubakkavelli. Aron Freyr Margeirsson kom Árborg yfir strax á 3. mínútu og Gestur Helgi Snorrason bætti við öðru marki á 35. mínútu. Staðan var 0-2 í hálfleik. Aron Freyr var aftur á ferðinni á 72. mínútu og á 80. mínútu skoraði Álafoss glæsilegt sjálfsmark með skalla fyrir utan teig. Niðurstaðan öruggur 4-0 sigur Árborgar.
Í Reykjaneshöllinni var meiri spenna þar sem Hafnir komust yfir á móti Hamri á 11. mínútu og staðan var 1-0 í hálfleik. Byrjunin á seinni hálfleik var ótrúleg en Hamar skoraði þrjú mörk á rúmum tveimur mínútum. Brynjólfur Þór Eyþórsson skoraði tvívegis og Guido Rancez eitt. Á 51. mínútu var staðan orðin 1-3 og þær reyndust lokatölur leiksins.
Það var dramatík í leik KFR og Álftaness á Hvolsvelli. Bjarni Þorvaldsson kom KFR yfir á 44. mínútu og staðan var 1-0 í hálfleik. Álftanes jafnaði metin þegar rúmt korter var liðið af seinni hálfleik og allt stefndi í 1-1 jafntefli, þar til á 89. mínútu að Álftanes komst yfir og þremur mínútum seinna skoruðu þeir þriðja markið. Lokatölur 1-3.
Staðan í deildinni er þannig að Hamar er í 2. sæti með 28 stig, Árborg í 3. sæti með 22 stig og leik til góða og KFR í 7. sæti með 8 stig.