Heil umferð fór fram í 4. deild karla í knattspyrnu í dag. Árborg og Hamar unnu góða sigra í sínum leikjum á meðan KFR tapaði naumlega á útivelli.
Árborg fékk Álafoss í heimsókn og þar var fátt um færi fyrr en á 42. mínútu að Kristinn Sölvi Sigurgeirsson kom Árborg yfir og staðan var 1-0 í hálfleik. Álafoss fékk vítaspyrnu í upphafi seinni hálfleiks en Stefán Blær Jóhannsson, markvörður Árborgar, varði hana glæsileg. Kristinn Sölvi var svo aftur á ferðinni þegar rúmt korter var liðið af seinni hálfleiknum og Gestur Helgi Snorrason innsiglaði öruggan 3-0 sigur Árborgar með marki fimm mínútum fyrir leikslok.
Það var mikið fjör í fyrri hálfleiknum í leik Hamars og Hafna á Grýluvelli. Brynjólfur Þór Eyþórsson kom Hamri yfir strax á 2. mínútu og um miðjan fyrri hálfleikinn skoruðu þeir Guido Rancez og Rodrigo Depetris með stuttu millibili. Hafnir minnkuðu muninn á 39. mínútu og staðan var 3-1 í hálfleik. Seinni hálfleikurinn var markalaus þar til á 76. mínútu að Depetris var aftur á ferðinni og tryggði Hamri 4-1 sigur.
KFR sótti topplið Álftaness heim og úr varð hörkuleikur. Álftanes komst yfir á 16. mínútu og staðan var orðin 2-0 eftir tæpan hálftíma. Bjarni Þorvaldsson rétti hlut Rangæinga á 38. mínútu og staðan var 2-1 í hálfleik. Þórður Kalman Friðriksson jafnaði fyrir KFR með glæsilegu aukaspyrnumarki þegar tíu mínútur voru liðnar af seinni hálfleik og staðan var 2-2 allt fram á 83. mínútu að Álftnesingar komu inn marki og tryggðu sér 3-2 sigur.
Staðan í deildinni er þannig að Árborg er í 2. sæti með 6 stig, Hamar í 5. sæti með 3 stig og KFR í 9. sæti án stiga.