Árborg og Hamar hófu leik í C-deild Lengjubikars karla í knattspyrnu í dag og unnu góða sigra. Árborg tók á móti Afríku á Selfossi og Hamar fékk Úlfana í heimsókn á Framvöllinn í Úlfarsárdal.
Á Selfossvelli kom Kristinn Sölvi Sigurgeirsson Árborg yfir gegn Afríku, strax á 4. mínútu og þar við sat þangað til undir lok fyrri hálfleiks að Árborg skoraði fjögur mörk á níu mínútna kafla. Andrés Karl Guðjónsson skoraði tvívegis og Freyr Héðinsson og Aron Ingi Þorkelsson bættu við mörkum. Staðan var 5-0 í hálfleik. Andrés Karl byrjaði seinni hálfleikinn á að kóróna þrennuna og Aron Freyr Margeirsson og Gunnar Hrafn Birgisson bundu lokahnútinn á 8-0 sigur Árborgar.
Hamar tók á móti Úlfunum í Úlfarsárdalnum og þar kom Arnór Ingi Davíðsson Hvergerðingum yfir á 11. mínútu. Úlfarnir jöfnuðu metin á 38. mínútu og staðan var 1-1 í hálfleik. Hamarsmenn voru sterkari í seinni hálfleiknum, Brynjólfur Þór Eyþórsson kom þeim aftur yfir á 65. mínútu og tveimur mínútum fyrir leikslok skoraði Arnór Ingi aftur og tryggði Hamri 3-1 sigur.
Árborg leikur í riðli-1 í C-deildinni en Hamar í riðli-4 og eru bæði lið í toppsæti sinna riðla sem stendur.