Árborg heimsótti Hafnir í 4. deild karla í knattspyrnu í Reykjaneshöllina í kvöld. Eftir magnaðan knattspyrnuleik hafði Árborg 2-5 sigur.
Hafnir eru í fallsæti í deildinni en þeir mættu tilbúnari til leiks í kvöld og voru komnir í 2-0 eftir fimm mínútna leik. Árborgarar voru slegnir en þeir náðu vopnum sínum fljótlega aftur og byrjuðu að þjarma að heimaliðinu.
David Dabrowski minnkaði muninn í 2-1 á 16. mínútu og tíu mínútum síðar jafnaði Andrés Karl Guðjónsson metin. Staðan var 2-2 í hálfleik.
Leikurinn var galopinn í upphafi seinni hálfleiks en á 56. mínútu skoraði David aftur fyrir Árborg og á 69. mínútu bætti Jökull Hermannsson fjórða markinu við. Þá féllust Hafnamönnum hendur og enn frekar á 76. mínútu þegar Jökull skoraði aftur og innsiglaði 2-5 sigur Árborgar.
Árborg er í 3. sæti deildarinnar með 29 stig en Hafnir eru í botnsætinu með 7 stig.