Árborg tók á móti Uppsveitum í lokaumferð C-deildar deildarbikars karla í knattspyrnu á Selfossvelli í gærkvöldi. Leiknum lauk með 8-0 sigri Árborgar.
Árborgarar voru fljótir að afgreiða leikinn því eftir 11 mínútur var staðan orðin 4-0. Heimamenn bættu við tveimur mörkum áður en flautað var til hálfleiks en David Dabrowski skoraði þrennu í fyrri hálfleik, Aron Freyr Margeirsson tvö og Kristinn Sölvi Sigurgeirsson eitt.
Seinni hálfleikurinn var öllu rólegri en Árborg hafði góð tök á leiknum áfram. Ari Rafn Jóhannsson breytti stöðunni í 7-0 á 49. mínútu og Steinar Aron Magnússon innsiglaði 8-0 sigur Árborgar um miðjan seinni hálfleikinn.
Árborg varð í 2. sæti riðilsins með 10 stig en Uppsveitir vermdu botnsætið án stiga.