Knattspyrnufélag Árborgar stendur vel að vígi eftir fyrri leik liðsins gegn KFS í 8-liða úrslitum 3. deildar karla í dag.
Liðin mættust síðdegis á Hásteinsvelli og sigraði Árborg 0-2. Það var fyrirliðinn Jón Auðunn Sigurbergsson sem skoraði bæði mörk liðsins.
Árborg var sterkari aðilinn framan af fyrri hálfleik en Jón Auðunn skoraði með góðu skoti utan úr teig á 23. mínútu. Þegar leið á fyrri hálfleik féllu Árborgarar aftar á völlinn og heimamenn voru nærri búnir að jafna á síðustu sekúndu fyrri hálfleiks en Njörður Steinarsson bjargaði á línu eftir að Einar Andri Einarsson hafði varið vel í marki Árborgar.
Á fyrstu mínútum síðari hálfleiks skapaðist tvívegis hætta uppvið mark Árborgar en Einar Andri var vel á verði sem fyrr. Eftir það höfðu Árborgarar góð tök á leiknum og fengu tvö góð færi áður en Jón Auðunn skoraði annað markið á 73. mínútu.
Seinni leikur liðanna er á þriðjudagskvöld kl. 20 á Selfossi og liðið sem vinnur samanlagt mætir annað hvort Tindastól eða Magna í 4-liða úrslitum.