Árborg heimsótti Elliða í Árbæinn í 4. deild karla í knattspyrnu í kvöld. Fyrir leik voru liðin með jafnmörg stig í 3. og 4. sæti deildarinnar og það breyttist ekki eftir leik kvöldsins.
Árborgarar réðu lögum og lofum á vellinum stærstan hluta leiksins og Aron Freyr Margeirsson kom þeim yfir með laglegu marki á 26. mínútu.
Staðan var 1-0 í hálfleik en þegar rúmt korter var liðið af seinni hálfleiknum jafnaði Elliði 1-1 og þær urðu lokatölur leiksins.
Þegar korter var eftir af leiknum fengu tveir leikmenn Elliða sitt annað gula spjald og þar með rautt en níu leikmenn Elliða pökkuðu í vörn og héldu út gegn ellefu Árborgurum. Það vantaði ekki færin en markvörður Elliða fór á kostum og bjargaði stigi fyrir sína menn.