Keppni í 4. deild karla í knattspyrnu hófst í kvöld en þrjú sunnlensk lið eru í deildinni; Árborg, Hamar og KFR. Árborgarar byrjuðu á góðum sigri en KFR og Hamar töpuðu sínum leikjum.
Árborg heimsótti Vængi Júpíters í Grafarvoginn, Árborgarar byrjuðu af krafti og Gestur Helgi Snorrason kom þeim yfir á 9. mínútu. Hann var svo maðurinn á bakvið sjálfsmark Vængjanna tíu mínútum síðar og staðan var 0-2 í hálfleik. Vængir svöruðu fyrir sig þegar rúmt korter var liðið af seinni hálfleiknum en það voru Árborgarar sem áttu lokaorðið. Gestur Helgi var þá enn og aftur á ferðinni og innsiglaði hann 1-3 sigur Árborgar með marki á 70. mínútu.
KFR tók á móti Elliða í miklum markaleik á Helluvelli. Elliði byrjaði betur og komst í 0-2 eftir 26 mínútna leik en þremur mínútum síðar minnkaði Helgi Valur Smárason muninn. Elliði jók forystuna nánast strax aftur í 1-3 og þannig stóðu leikar í hálfleik. Seinni hálfleikurinn hófst á sjálfsmarki Elliða og á 70. mínútu náði Bjarni Þorvaldsson að jafna leikinn, 3-3. Elliði sótti stíft í lokin og þeir náðu að skora tvívegis á síðustu fimm mínútunum og tryggja sér 3-5 sigur.
Hamar var í heimsókn hjá Álftanesi og þar réðu heimamenn lögum og lofum. Álftanes skoraði tvisvar á fyrsta korterinu og bætti svo við tveimur mörkum á síðustu tíu mínútum fyrri hálfleiks, 4-0 í leikhléi. Hamar minnkaði muninn snemma í seinni hálfleik en markið var sjálfsmark Álftnesinga. Á 70. mínútu bætti Álftanes svo við fimmta markinu og lokatölur leiksins urðu 5-1.
Önnur umferð deildarinnar verður spiluð á uppstigningardag. Hamar á þá heimaleik gegn Höfnum, Árborg fær Álafoss í heimsókn og KFR fer á Álftanesið.